පාර්ලිමේන්තුව

පනත් කෙටුම්පත් පිළිගැන්වීම

මැතිවරණ (විශේෂ විධිවිධාන) (සංශෝධන)

ගරු සමාජසේවා හා සමාජ සුභසාධන අමාත්‍යතුමා විසින් මැතිවරණයකදී ඡන්දය ප්‍රකාශ කිරීම සඳහා යම් තැනැත්තකු විසින් පූර්ණ දෘෂ්‍යාබාධිත තැනැත්තන්ව කැටුව යාමට අවශ්‍ය විධිවිධාන සැලැස්වීම පිණිස ද; (262 වැනි අධිකාරය වූ) පළාත් පාලන මැතිවරණ ආඥාපන‍ත, 1981 අංක 1 දරන පාර්ලිමේන්තු මැතිවරණ පනත, 1981 අංක 7 දරන ජනමත විචාරණ පනත, 1981 අංක 15 දරන ජනාධිපතිවරණ පනත සහ 1988 අංක 2 දරන පළාත් සභා මැතිවරණ පනත සංශෝධනය කිරීම සඳහා ද; ඊට සම්බන්ධ හෝ ඊට ආනුෂංගික කරුණු සඳහා විධිවිධාන සැලැස්වීම පිණිස ද වූ පනත් කෙටුම්පත ඉදිරිපත් කරන ලදී.


ගරු නිරූපමා රාජපක්ෂ මහත්මියට පහත පනත් කෙටුම්පත් ඉදිරිපත් කිරීමට අවසර දෙන ලදී:-

1. රණ කලා ආයතනය (සංස්ථාගත කිරීමේ)
2. ශ්‍රී ලංකා ව්‍යවහාරික සංඛ්‍යානවිද්‍යා ආයතනය (සංස්ථාගත කිරීමේ)


අද දින සභාවේ ප්‍රධාන කටයුතු

මහජන ආරක්ෂක ආඥාපනත යටතේ යෝජනාව

1959 අංක 8 දරන පනතින් ද ජාතික රාජ්‍ය සභාවේ 1978 අංක 6 දරන පනතින් සහ 1988 අංක 28 දරන පනතින් ද සංශෝධිත (40 වන අධිකාරය වූ) මහජන ආරක්ෂක ආඥාපනතේ 2 වැනි වගන්තිය යටතේ අතිගරු ජනාධිපතිතුමා විසින් ඉහත කී ආඥාපනතේ II වැනි කොටසේ විධිවිධාන 2009 ඔක්තෝබර් මස 02 වැනි දින සිට ශ්‍රී ලංකාව මුළුල්ලේම ක්‍රියාත්මක කරමින් කරන ලද ප්‍රකාශය ගරු අග්‍රාමාත්‍ය, අභ්‍යන්තර පරිපාලන අමාත්‍ය සහ රාජ්‍ය ආරක්ෂක, මහජන ආරක්ෂාව, නීතිය හා සාමය පිළිබඳ නියෝජ්‍ය අමාත්‍යවරයා විසින් ඉදිරිපත් කරනු ලදුව සම්මත විය.

ඒ අනුව, හදිසි නීතිය තවත් මසකට දීර්ඝ කරමින් හදිසි නීති විවාදය වැඩි ඡන්ද 70 කින් සම්මත විය. යෝජනාවට පක්ෂව ඡන්ද 82 ක් ප්‍රකාශ වූ අතර ඊට විරුද්ධව ඡන්ද 12 ක් ප්‍රකාශ විය.


අනතුරුව, සභාව පැය 1630 ට 2009 ඔක්තෝබර් මස 9 වැනි සිකුරාදා පැය 0930 දක්වා කල් තබන ලදී.

 

 

 

*  මෙය සංස්කරණය නොකරන ලද අනුවාදයකි. මෙදින කටයුතුවල නිල වාර්තාව සඳහා කරුණාකර හැන්සාඩ් වාර්තාව බලන්න.